Finnmárku – Gos niegut ollašuvvet

Álggahit iežas fitnodaga

Lone Synnøve Hegg ollašuhtii niegustis ahte álggahit geasuheaddji bargosaji ruovttufylkkas, ja buot deháleamos lei beassat iežas hoavdan. Kreativ Industri fitnodagas son ovttastahttá máhtu ja dieđalašvuođa hutkkálašvuođain ja innovašuvnnain.

Golbma jagi maŋŋil lea gávpevuođđudus, mii ásahuvvui ruovttus soffás, šaddan fitnodahkan mas lea vihtta bargi Čáhcesullos ja Álttás. Sii doibmet báikkálaččat, guovlulaččat ja riikkadásis.

-Mun álggahin fitnodaga jagi 2009. Mu bargoduogáš ja fierpmádat ovddit bargosajiin, earret eará Finnmárkku fylkkagielddas ja Finnut Consult:s leat leamaš ávkkálaččat, ja mun lean ožžon bargguid vuosttas beaivvi rájes. Lea erenoamáš somá go gilvalemiid oktavuođas vuittiimet skandinávalaš fitnodaga badjel gos leat máŋga čuođi bargi. Muhto ovdal go dohko olliimet, leat mii vásihan dan maid olu priváhta fitnodagat vásihit, namalassii botnemeahttun skurččuid ja rukses loguid. Smávva ja hearkkes fitnodagaide lea stuorra veahkkin ahte ii dárbbaš máksit bargoaddidivada Finnmárkkus. Mii maid vásiheimmet ahte Innovašuvdna Norga Finnmárkkus leai dehálaš doarjjan dien áiggi, muitala Hegg.

Sihke sus ja advokáhttaisidis Andreas:s lei lohkanloatna go gearggaiga Romssa universitehtas. Fárrema oktavuođas Finnmárkui lei loana vuolideapmi ovdamunni. Badjelaš jagi dassá fárriiga soai ja sudno guokte máná Áltái, ja soai ásaheigga ossodagaid dohko.

-Lea hui somá go mu fitnodat lea šaddan geasuheaddji bargosadjin earáide geat háliidit ásaiduvvat Finnmárkui. Go mii almmuheimmet guokte virggi geassit 2012, de ledje 50 allaoahppan olbmo geat ohce dáid virggiid. Máŋggas ledje finnmárkulaččat geat háliidedje fárret ruovttoluotta
Finnmárkui. Finnmárku lea buorre, ii dušše luonddu dihtii, muhto maiddái gelddolaš bargosajiid ja ealáhusovdáneami dihtii, cealká hutkkálaš fitnodatjođiheaddji.