Finnmárku – Gos niegut ollašuvvet

Máksojuvvon lohkanloatna

Jan Frode Skogan guđii Trøndelaga vásihit mo Girkonjárggas lea orrut. Son ásaiduvai, ja lohkanloatna nogai.

Lei stuora ráhkisvuohta mii buvttii su Finnmárkui. Áiggi mielde šadde guokte máná, viessu ja ruoktu, ja ekonomalaš ja eará geatnegasvuođat. Sihke Jan Frode ja eamida lohkanloatna šattai unnit ja unnit, ja loahpas nogai áibbas. Dál son orru dáppe go son lea sakka liikostan sihke olbmuide ja lundui.

-Maŋŋil soahtebálvalusa Davvi-Norggas ledjen mearridan ahte in áigun šat goassige vuolgit davvelii go Namsosa. Muhto de deiven Hanne oahpaheaddjiallaskuvllas. Son lea eret Girkonjárggas ja moai háliideimme áiddo oahppan oahpaheaddjin bargat oanehisáiggi davvin. Geahččalanáigi lea dál juo bistán duhátjahkemolsašumi rájes, bohkosa Jan Frode.

Son loaktá dáppe hui bures go dáppe lea buorre dálkkádat ja dáppe son beassá návddašit luonddu ja leat mielde valáštallamis.

-Liikun bures go dáppe arvá hárve. Mánát oassálastet spábbačiekčamiin, giehtaspeažžumiin ja čuiget, ja dalle gártet olu olgodoaimmat.

Dasa lassin lea son, nugo olu eará váhnemat Finnmárkkus, hárjehallin báikkálaš spábbačiekčansearvvis.

Sihke eamit ja Jan Frode leaba oahpaheaddjit. Eamit bargá Girkonjárggas ja Jan Frode fas smávit skuvllas Ruovdavuonas. Dat lea 1-10 skuvla gos ohppiidlohku lea vuollel 30.

-Ruovdavuonas mii bargat hui lahkalagaid. Lea hárve ahte okta oahpaheaddji čuovvu ohppiidis vuosttas gitta logát luohká rádjai, muhto dan sáhttit dáppe dahkat. Dat addá oadjebas dili, dadjá buorremielalaš trøndelagalaš.