Der drømmer blir virkelighet

Dárbbaša bargoustibiid

Martin Nordbye, Kárášjogas eret, lea sámegieloahpaheaddji Gorravári skuvllas,- mánáidskuvla Álttá suohkana guovdu. Dáppe son lea orron 13 jagi, lea gávdnan ráhkisvuođa ja lea náitalan. Muhto visot álggii oahpuin maid son válddii ovddeš Finnmárkku allaskuvllas, mii odne lea UiT Norgga árktalaš universitehta.

-Mus lei hui buorre dovdu go bohten Áltái. Mun álgen studeantan, ja dál duođai lean váldime joatkkaoahpu. Dáppe lea buorre studeantabiras. Mun in dieđe man ollu studeanttat dat dál leat Álttás, muhto mun jáhkán goit ahte birrasiid duháha leat. Dáppe lea hui buorre studeantasearvi. Doppe leat čeahpes olbmot, geat fuolahit ahte mis lea buorre studeantafálaldat ja lágiduvvojit ovdamearkka dihte ollu buorit konsearttat, muitala Nordbye.

Ieš berošta son falástallamis ja čiekčá spáppa njunušdásis Alta IF ovddas. Son liiko maiddái go leat nu ollu eará vejolašvuođat sihke olgodoaimmaide ja sistedoaimmaide.

-Álttás čáppa meahcci birastahttá min. Mis leat bures huksejuvvon čuoiganláhtut ja leat ollugat geat čuiget. Mis lea maiddái skirvehallanluohkká, mii lea bivnnuhis doaibma. Mis lea ođđa basseaŋŋa, ja leat diehttelasat ollugat geat čikčet spáppa ja geat liikojit giehtaspáppastallát, nu ahte lea ollu maid sáhttá bargat astoáiggis. Mun loavttán áiggi bures.

Martin Nordbye ávžžuha sin geat háliidit geahččalit dáppe davvin orrut dušše vuolgit deike, vaikko dáppe orru leame guhkki juohke báikái. Ii ádján eanet go guokte diimmu girdiin Oslos deike. Son diehtá ollugiid birra geat bohtet deike ovtta dahje guovtti jahkái, ja leat ain orrume dáppe vaikko lea golihan 10  ja 20 jahki.

-Dáppe Finnmárkkus lea veaháš eará ládje go Lulli-Norggas. Mis lea guhkes geassi, muhto guhkes dálvi nai. Lea čielggas ahte lea hui earenoamáš dálvet skábman ja beivviin mii geasset ii goasse luoitát. Don fertet álggos dušše geahččalit dáppe leat, dadjá son.

Nordbye oaččui jođánit barggu sámegieloahpaheaddjin mánáidskuvllas maŋŋel go gearggai oahpuin, ja Finnmárkkus dárbbašit  eambbo dakkáriid go son.

-Dus leat eanet vejolašvuođat jus máhtát sámegiela. Don sáhtát ovdamearkka dihte šaddat oahpaheaddjin dego mun. Dáppe leat ollu sámegielagat, ja ollu sámi váhnemat háliidit sámegielfálaldaga iežaset mánáide skuvllas.